जेमा नदीमा बनियो पुल: लाचेनदेखि चीन सिमानासँग महत्त्वपूर्ण रणनीतिक सडक सम्पर्क बहाल गर्न सीमा सडक सङ्गठन सफल
N.B. Ghimirey
1 min read
मंगन, १८ सेप्टेम्बर: गत वर्षको ३ र ४ अक्टोबरमा गएको टिस्टा बाढीका कारण उत्तर सिक्किममा स्थित अन्तर्राष्ट्रिय सीमासम्म पुग्ने सडक सम्पर्कमा धेरै समस्या भइरहेको थियो भने अहिले सीमा सडक सङ्गठन (बीआरओ) यो सम्पर्क पुनस्थापित गर्नमा सफल भएको छ। परिस्थितिको गम्भीरतालाई महसुस गर्दै स्वस्तिक परियोजनाअन्तर्गत बीआरओका कार्यकर्ताहरू जेमा नदीमा नयाँ बेली ब्रिज निर्माण गर्न लागिपरेका थिए भने त्यो काम अहिले पूरा भएको छ। २४ अगस्टदेखि अबुटमेन्ट निर्माणको काम सुरु भएको थियो भने पुलको उद्घाटन एक महिनाभन्दा कम समयमा भएको छ।
गत वर्ष ४ अक्टोबरको बिहान दक्षिणी ल्होनाक ताल फुटेर आएको बाढीले टिस्टा नदीको किनारमा व्यापक क्षति पुर्यएको थियो भने लाचेन उपत्यकाका छवटा अत्यावश्यक पुलहरूसहित लगभग १६-वटा पुललाई क्षति पुर्याएको थियो। यसरी लाचेन उपत्यकामा रहेको चीनको सिमानासँगको रणनीतिक सञ्चार लाइनहरूमा धेरै क्षति पुगेको थियो।
उत्तर सिक्किममा अत्यावश्यक जडान पुनर्स्थापित गर्न बीआरओले काम गरिरहेको थियो। प्रारम्भिक चरणमा बीआरओले सेनासँगको समन्वयमा टिस्टा नदीमा साङ्कलाङ, चुङ्थाङ र जेमामा धेरै बेली ब्रिज निर्माण गरेको थियो। सङ्गठनले ८ अप्रिलसम्म उत्तर सिक्किममा सफलतापूर्वक सवारी साधनको जडान पुनर्स्थापित गरेको थियो।
२९ मईमा आएको चक्रवात रेमालको कारण उत्तर सिक्किममा भारी वर्षा भएको थियो जसको परिणामस्वरूप लाचेन छुमा अचानक बाढी आएको थियो। यसले जेमा नदीमा बनाइएको बेली ब्रिज बगाएको थियो भने निर्माणाधीन बेली सस्पेन्सन ब्रिजहरूमा ठूलो क्षति पुर्याएको थियो। जेमाको महत्वपूर्ण बेली ब्रिज बगाएपछि लाचेन उपत्यकाको चीन सीमासँगको रणनीतिक सञ्चार लाइन फेरि एकपटक विच्छेद भएको थियो।
अहिले सीमा सडक सङ्गठनले जेमा नदीमा फेरि पुल स्थापित गरेको छ। यस अत्यावश्यक पुलको निर्माणले स्थानीय मात्र नभई चीन सिमामा तैनाथ सशस्त्र बललाई धेरै सहयोग पुग्ने बताइएको छ।
परिचय
