मल्ली, ८ जनवरी: जमिनी तहसम्म सङ्गठन विस्तार गर्ने अभियानअन्तर्गत सिटिजन एक्सन पार्टी–सिक्किमले १२–मल्ली निर्वाचन क्षेत्रअन्तर्गत मल्ली डाँडा पायोङ जीपीयूको मल्ली गुम्पा वार्ड नम्बर २ मा युनिट भोलिन्टियर्स काउन्सिल गठन गरेको छ।
पार्टीको मल्ली निर्वाचन क्षेत्रको ड्राइभर काउन्सिलका उपाध्यक्ष विजय प्रधानको निवासमा सम्पन्न बैठकमार्फत यूभीसी गठन गरिएको हो। पार्टीको प्रचारप्रसार काउन्सिलद्वारा जारी प्रेस विज्ञप्तिअनुसार, उक्त अवसरमा यूभीसीका पदाधिकारीहरू सर्वसम्मत रूपमा चयन गरिएका थिए।
नवगठित यूभीसीका प्रमुख संयोजकमा सञ्जय तामाङ, उपाध्यक्षमा सीता राई, सचिवमा नीरा देवी प्रधान, युवा संयोजकमा रवि तामाङ, महिला संयोजकमा बिन्दु प्रधान तथा कोषाध्यक्षमा शान्ति राई चयन भएका छन्।
बैठकको अध्यक्षता सिटिजन एक्सन पार्टीको मल्ली क्षेत्रका अध्यक्ष अम्बर खुलालले गरेका थिए। कार्यक्रममा पार्टी प्रवक्ता अल्बर्ट गुरुङ, नाम्ची जिल्लाका युवा संयोजक डम्बर छेत्री, मल्ली क्षेत्रकी महिला संयोजक कमला राईसहित वार्डका अन्य पार्टी कार्यकर्ताहरूको उपस्थिति रहेको थियो।
पार्टीका अनुसार, युनिट भोलिन्टियर्स काउन्सिलको गठनले जनमुखी राजनीति, सहभागितामूलक लोकतन्त्र र स्थानीय तहको सशक्तीकरणप्रति सिटिजन एक्सन पार्टी–सिक्किमको प्रतिबद्धतालाई अझ बलियो बनाउनेछ।
परिचय
