दक्षिण कोरियाको इतिहासकै भीषण वन डढेलो शुक्रबार बिहान पूर्ण रूपमा नियन्त्रणमा आएको छ। करिब एक हप्तासम्म दक्षिणपूर्वी प्रान्तहरूमा फैलिएको आगलागीमा परी २८ जनाको मृत्यु भएको छ, जसमा उत्तर ग्योङसाङमा २४ र दक्षिण ग्योङसाङमा ४ जनाले ज्यान गुमाएका छन्। घटनामा ३२ जना घाइते भएका छन्।
गृह तथा सुरक्षा मन्त्रालयका अनुसार आगलागीबाट ३८,००० हेक्टरभन्दा बढी भूभाग जलेको छ भने ३,४८१ संरचना ध्वस्त भएका छन्, जसमा १,३०० वर्ष पुरानो गौन्सा मन्दिरसहित २३ ऐतिहासिक सम्पदा क्षतिग्रस्त छन्। डढेलोका कारण ३७,८०० भन्दा बढी मानिस विस्थापित भएका थिए, जसमध्ये ८,५३६ जना अझै अस्थायी शिविरमा बस्न बाध्य छन्।
डढेलो नियन्त्रण गर्न ९,००० अग्निनियन्त्रक र १२० वटा हेलिकप्टर परिचालित गरिएका थिए। घटनाका क्रममा एउटा हेलिकप्टर दुर्घटनाग्रस्त भएको भए पनि दुर्घटनाको कारण अझै स्पष्ट भइसकेको छैन। वर्षा र चिसो मौसमका कारण आगलागी रोक्न सहयोग पुगेको बताइएको छ। कार्यवाहक राष्ट्रपति हान डक-सूले यसलाई ‘अभूतपूर्व विपत्ति’ भन्दै जलवायु परिवर्तनले आगलागीको जोखिम बढाएको चेतावनी दिएका छन्। अहिले प्रभावित क्षेत्रहरूमा पुनर्निर्माण तथा राहत कार्य तीव्र रूपमा अघि बढाइँदै छ।
परिचय
